قصيده غزليه...........لطلال الرشيد

ذكرتك والزمان غروب ذكرتك والمكان الشط بالصدفه
ذكرتك والعيون تذوب دمع من حنيني ماستر خافي

ذكرتك يوم شفت الشمس غابت والقمر ينساب من شرفه
ذكرتك والنجوم تلون لحاف السماء وتعاتب الجافي

ذكرتك نصف قلبي هم شوق وهم حبك ماخذ نصفه
ذكرتك كل مافيني حنين ودمعتين وكفي الدافي

ذكرتك ما ذكرت الى عيونك والجبين و كل ما اعرفه
ذكرتك مانسيت الى جروحي والانين ودمعي الصافي

انا اول عزاي اني حملت العاشق الي مانسى حلفه
وانا اخر عزاي انك نسيتيني وانا طيفك معي وافي

تلوم اللى تفانى في طريق مالقى في اخره ولفه
الى منه بكى كل الندم في حجر عينه غصب ينشافي

اروح ولا طرت حنيت مثل مضيع يركض على حتفه
ولا ناديتها كسر حنيني جوف صدري مثل مجدافي

يبيك اللي عيونه ماقوت تحمل قليل من بعض عطفه
يبيك اللى مشالك او مشابك او مشى في سكتك حافي

يبيك اللي اذا شافك تلعثم بالكلام وينصعب وصفه
يبيك اللي يشوفك شمس والدنيا ظلام ودفتره طافي

انا قلت ازعلي خليني اشوف الحنين وش مدى نزفه
انا ماقلت خليني اقول من الوفاء يالله ياكافي

اموت وما اعود اتذكرك والمشكله طيفك ملا الغرفه
واموت وما اعود انساك ياحبي القديم الصادق الوافي

طلال العبدالعزيز الرشيد